AneKateLuceMare Ottozez E Kate pretirala si u naše vrime ni tako bilo, imali su i drugoga posla a danas moradu otspat prvo jer jedva dojdedu do kreveta a unda tek deladu ovo ča si rekla a slike mećedu drugi oni tek za par dan.I popi tu kafu da ti jezik prodela. Ane
AneKateLuceMare Ottozez Ooooooo dragaaa... ma jes li ti to meni otkrmeljila? Ja san uprav maloprvo svoje krmelje pokupila na nu Vijoleta maramicu..ben ti krmeljin od vog prolića, sve se rascvitalo valja energija... A ča se tiče mladencov... alaaaa... dalo bi se pisat.. eee istina u naše vrime su se brojali dupli lusteri, frižderi i minjalo se u trgovinmi .. a ki je imal sriću mogal je i sobu dobit , a sljike su se dobile nakon par dan.. dvi za kumove..dvi za mladence i unda daš nome ča povećava i unda un dojde nakon godinu dan i lipo vrgneš na zid iznad kreveta.. a ča se dalje dogaja.. uuuu dalo bi se pisat... Ma ljubi te Tvoja Kate...
AneKateLuceMare Ottozez Vidiš ča kafa dela man se jezik razveže, vidi nebi ja o voj temi znaš, sad su moderna vrimena pa će narod reć kako smo ja i ti zaostale i ča još svašta eli a nismoooo, samo mi se čini da je unda bilo nekako lipše, ja se sićan da san dobila 5 isti garnitur iz robne kuće ni nekakovi žlic još se isad razvlačidu po kući a krevetnine evo rižen za krparu pa ću tkat, niš po šteti, i sad lipo kad satken krparu opet koda san dobila dar od svadbe , a oni potrošidu novce i ničega se ne sićadu a ja lipo iman krpare. Ma kažen ti bolje je bilo. Ane
AneKateLuceMare Ottozez E pa eee... istina.. uvik ti se razvlačidu ve uspomene od nih dan kako smo bile lipe i mlade i blesave.. ja istinu za volju ne mislin kaj ni ti da smo zaostale.. mi smo se lipo udale po nin običajima kako su nan naši rekli.. unda je bilo natezanja ki će doć na svadbu.. zovi vog zovi nog.. ma svi su se sretno odazivali..zač? Jer je i njima tih duplikatov bilo po kući pa zamotadu u naj beli papir ča se meso pakovalo, stavidu nu traku, kaj paket i napišedu sretno mladenci... a kutijaaaa.. velkaaaa... a kad otvoriš unutri fen za kosu! Ajoooo a kad se sjetin torti... ni bilo vih na stepenice.... bile su torte bele i ukrašene sa nin biljen asparaguson.. esan li dobro rekla... puuune margarina.. orahov u tragovima...al fiiine... ma sićaš se a? Kate
AneKateLuceMare Ottozez Aj muči više evo se rasplaka, samo znaš ve su sad nekako lipe izvana a ne naše su bile lipe iznutra, a čase tiče papira onda se razvijala kreativnost znaš i man si po daru vidil kako je ki sposoban , aj danas vidi ča znaš ča je u kuverti, najviše prazni ni tu lipu tortu nemoreš platit.E moja Kate ni sve ča je lipo izvana lipo i iznutra,običaji su ipak bili nekako za zapamtit, danas samo gljedadu slike i filme o svadbi pa se čudiš koiiko ti naroda bilo ke pozneš i nepozneš a za muziku da i ne divanin,niki s nikin ne pleše pa misliš da si u disku, ma bože sačuvaj.
AneKateLuceMare Ottozez A znaaan Ane moja... vidin ja... imadu svadbu od dvista duši , a bome i od pet stotin ..niki nikog ne pozne.. a ča se tiče plesa... aaa o tome neću divanit... muški dusaju bože mi oprosti kaj da su pomunjenili, a ženske na nin peticami od dvajst centimetri ne mičedu se.. kaj kipići su... ča se tiče lipote izvana,, aaa znan i to...koverti tone... vaj ča snima lipo sve usnimi, samo i gosti su mudri, ka da se dogovoridu da koverte bude iste veličine i iste boje.. pa ti sad pogodi ki je dal punu , a ki praznu... ali Ane moja.. mladence to ni briga..plaćadu ćaće i matere.. dižu se krediti... ma niiitoga bilo kod nas.. niii... i znaš ča je najgore.. svi projdedu kući i unda drugi dan divanidu ča je bilo dobro a ča loše... Ma nami je baš bilo lipo.. bez obzir ča smo dobivale duplikate... em smo tancale, em smo jutra dan svekrivami morala južinu na stol donest.. em ni bilo vog putovanja, nego upoznavanje sa imanjen kolko ovčicov... ma baš lipo.. eeee i zaboravi... nismo raspakovale ne poklone dok svekar i svekrva nisu došli... morali su i uni vidit i prebrat ča god i sebi.. eli...ma joooj kad se sitim lipih vrimena..Kate...
AneKateLuceMare Ottozez Ahahahahah eee tako se poštivalo starije i svima bi opet svega ostalo, ajd ti danas preberi kad čin prebrojidu novce i duše na svadbi moredu man novce ostavit nome otelu i još kući s minuson ali imadu lipe kuverte za uspomenu.A da ti ne kažen kako je ćaćami i materami neki moradu od muke na hitnu a drugi mislidu da od sriće ili nedaj bože pića eli. Ajme meni jadna ti san i mene to čeka , morat ću se polako privikavat na taj štres a Kate ča misliš oćemo li nas dvi to preživit vako umne i sposobne?
AneKateLuceMare Ottozez Eeeee nego ča! Je je hitna... više od mišanja pića, al o tom po tom... a nas dvi to čeka nego ča... samo mislin draga moja da se va naša dica nova dženrejšn neće uvatit vakovog derneka..znaš zač.. uni ti lipo budedu na našin leđin do svoje trist pete šeste..unda nas otpilidu jer smo stare i vrgnedu nas u dom.. nismo in potrebne.. unda nan još vrgnedu papir da potpišemo da je sve njihovo...eee nemoj sad reć da to ni istina... ali ali ali... Ane i Kate će lipo za takove slučajeve složit kontrakt i kaj Švabe ili ni Šveđani lipo nakon študija svoje dice ..oteeee lipo evo van računi za ve režije a nas dvi idemo u život..pušćimo ih misec dva nek se snajdedu..ako in bude pasalao unda ćemo se dogovorit oće li nas kaj goste zvat u svadbu koju će uni organizirat, a nakon toga dat ćemo in kartice sa tisuću kun za početak.. aaa ča veliš? Je da su nan dica , ali ih treba malo stisnut...tvoja Kate:)
AneKateLuceMare Ottozez Ajmeeeee ča si ti pametna, ma baš si me lipo rešila brige, tako tako , lipo se mi uredimo i u svateee ,damo in lipo na karticami pa neka trošidu,samo znaš sve se nekako bujn kakova je situejšen kako ti kažeš , da nećemo imat čin i taj naš dom platit ili režije u kući ako ne projdemo u dom pa ćemo morat do smrti bit ili dadilje ili kuvarice. ali glavno da si ti meni rešila problem svatov. Ma ča bi ja bez tebe.
AneKateLuceMare Ottozez Uuuuuh skoro se prestraši ča si napisala za jednu vu imenicu... eeee nego ča... a to ako budemo delale eeeej Ane to je dobrooo... uvik u pokretu, neće nan vi mišići strunut.. a ako budemo delale u kujinji nećemo bit gladne.. eeee... ma ča san pametna.. a kako mi lipo znamo zakuvat more bit se i kaj najde ki dojde u dom da upozne ku babu ? Ajmeeee ča mi svačesa pada na pamet.. pitan se jel u voj kafi ča san skuvala nekakov inteligentni ormon.. bit će da je... ma zamisli moja Ane... ti ja i nji dva .. svadba u domu..ne moredu nan niš.. stari , a nas dvi kaj prepelice i bacimo drmeš... uni krenedu i padnedu..u međuvrimenu nan zbog drmeša dadu kuću na moru, selu i ku dijonicu.. ajoooo..ovo ide predaleko...Tvoja Kate..
AneKateLuceMare Ottozez E pa sad si pretirala jako, ma do čega je tebi a ja u štresu, ma biće da si uz kafu još nešto popila.O Kate, Kate, a u domu ti je sirotinja kaj i mi dica in sve zela a oni nemadu ni za kafu.E baš te uvatilo jutros,Nego lipo se spakuj i odi na mašu sad će počet da ti te misli i naumi projdedu iz glave. Lipo ćemo mi delat dok moremo a kad nebudemo mogli iznešćedu nas gori kod ne gospe iz učilišća i tako ćemo završit kaj većina. Ona o drmešu ajoolo jadna ti san kani se drenove i na mašu odi.Ane.
AneKateLuceMare Ottozez Aneeee... nisan ni zericu pretirala.. viruj mi.. p.s. ča se tiče maše i o tome moramo divanit... nešto san čula , ali to ostavljan za naše oči i uši... radi se o razglasu , samo napominjen.. a ča se tiče gospe u učilišću eeee una nan je rekla da složimo kako una veli program i dojdemo se dogovorit , plaćanje .. kad na rušvi rodidu orasi... eeee... a maša je na hateveu , ne moren do crkve iman upalu mišićev od tipkanja i jučerašnjeg trčanja za guskami ča su mi pobigle.. eto... videre kako una kaj ne bi sa dedima.. alaaa .. alaaaa.. muči , muuučiiii...
AneKateLuceMare Ottozez Kate moja ja nemoran ni radijo slušat ,ni televizor gljedat samo stobon podivanin i sve znan i ne bolili te mišići kad sve to stigneš čut i vidit. Iden lipo zeru ve juve skuvat pa ću napravit sosa i krumpira nisan to dugo kuvala.Lipo je vrime pa ću popodne zeru prošećat da vidin jeli se ča voda povukla, tebe bolidu mišići pa te neću zvat da dojdeš a te misli iz glave o domu i dedima man k vragu pošalji a neću više delat nikakov program neman kad ide posal u bašći.Lipo pozdravi nu gospu ti ćeš je prije vidit pa joj reci.Ane.
webmaster@nasa-lika.com
Forum
Pomoć
Traži
Prijava
Registracija
Tema: Najfriškije (Posjeta: 2218 )
